Helgina 28. til 29. september lagði Jömm í langferðalag til Svíþjóðar. Eftir að hafa hlotið nafnbótina Götubiti fólksins í undankeppni European Street Food Awards í Reykjavík var ekki hjá því komist að standa fyrir máli okkar í útlöndum. Þegar við slysuðumst til að hefja Jömm ferilinn í litlum gámi á bílaplani í Skeifunni síðasta sumar áttum við aldrei von á öðru eins ævintýri, en með okkar innri brjálæðinga að vopni héldum við yfir hafið.
Þar sem Jömm gámurinn okkar fagri er ekki sérstaklega meðfærilegur í handfarangri fengum við lánaðan dýrðlegan „Miami Vice” matarvagn hjá keppnishöldurum í Malmö. Við brettum upp ermar…og skálmar…og settum upp fullbúið Jömm á tveimur dögum með hjálp góðra vina. Metnaðurinn var slíkur að nýtt Jömm skilti var meira að segja föndrað ofan á vagninn kvöldið fyrir opnun. Við tókum okkur stöðu innan um 20 aðra staði – sigurvegara frá sínum heimalöndum…og Jömmuðum frá okkur allt vit í tvo heila daga við mikinn fögnuð viðstaddra.
Hversu mikið var Jömmað?
- Við afgreiddum 1.100 Jömm skammta
- Við Jömmuðum heimþráða Íslendinga
- Frelsuðum kjötelskandi útlendinga
- Eignuðumst nýjan, sænskan vildarvin sem fékk sér 6 Jömm sama daginn
- Gáfum Michelin kokki að borða
- Sváfum í um það bil heila viku að partý loknu
…og síðast en ekki síst náðum við frábærum árangri í vinsældakosningu gesta sem kusu okkur í TOPP FIMM meðal hinna bestu í Evrópu. Enn sem komið er geta Íslendingar og Íslandsvinir einir þjóða notið Jömm á hverjum degi, svo láttu þig ekki vanta á Kringlutorg næst þegar hungrið gerir vart við sig. Gleðisprengjurnar okkar þar galdra fram fyrir þig sósaða máltíð á mettíma.